ପନିପରିବା ଚାଷ

ଉତ୍ତମ ସ୍ୱା୍ସ୍ଥ୍ୟ ପାଇଁ ପନିପରିବାର ଆବଶ୍ୟକତା ଖୁବ ଅଧିକ । ବିଶେଷ କରି ଦେହରେ ରୋଗ ପ୍ରତିରୋଧକ ଶକ୍ତି ବଢାଇବା ପାଇଁ ଯେଉଁ ଭିଟାମିନ, ଖାଦ୍ୟପ୍ରାଣ, ଧାତବ ଲବଣ ଓ ତନ୍ତୁ ଦରକାର ହୋଇଥାଏ, ତାହା ବିଭିନ୍ନ ପ୍ରକାର ପନିପରିବାରୁ ସହଜରେ ମିଳିଥାଏ । ଆଇ.ସି.ଏମ.ଆର. ରିପୋର୍ଟ ଅନୁସାରେ, ପ୍ରତ୍ୟେକ ବୟସ୍କ ଭାରତୀୟଙ୍କ ସୁନ୍ଦର ସ୍ୱାସ୍ଥ୍ୟ ପାଇଁ ଅନ୍ତତଃପକ୍ଷେ ପ୍ରତ୍ୟେକ ଦିନ 300 ଗ୍ରାମ ସବୁଜ ପନିପରିବା ମଧ୍ୟରୁ 125 ଗ୍ରୃାମ୍ ଶାଗ ଜାତୀୟ, 100 ଗ୍ରାମ୍ ମୂଳ ଓ କନ୍ଦ ଜାତୀୟ ଓ 75 ଗ୍ରାମ୍ ଅନ୍ୟାନ୍ୟ ପନିପରିବା ହେବା ଆବଶ୍ୟକ ।

ତେବେ ଆସନ୍ତୁ ଜାଣିବା ପନିପରିବାର ଶ୍ରେଣୀ ବିଭାଗ ।

ପନିପରିବା ଚାଷ ପାଇ ମନେରଖିବା ଜିନିଷ ।

• ସାଧାରଣତଃ ସବୁଜ ପନିପରିବା ଚାଷ ଏକ ଲାଭ ଜନକ ବ୍ୟାବସାୟ ।  ତେଣୁ ପ୍ରତ୍ୟେକ ଚାଷୀ ନିଜ ନିଜର ଶକ୍ତି ଅନୁସାରେ ବୈଜ୍ଞାନିକ ପ୍ରଣାଳୀରେ ପନିପରିବା ଚାଷ କରି ଲାଭବାନ ହୁଅନ୍ତୁ ।
• ସବୁସମୟରେ ଉନ୍ନତ କିସମ ବିହନ ସଠିକ୍ ସ୍ଥାନରୁ କିଣି ପନିପରିବା ଚାଷ କରନ୍ତୁ ।
• ପନିପରିବା ଚାଷ ସମୟରେ ସର୍ବଦା ବିହନ ବିଶୋଧନ କରି ଚାଷ କରନ୍ତୁ ।
• ପନିପରିବା ନର୍ସରୀ ସ୍ଥାନକୁ ଭଲଭାବରେ ଚାଷ କରି, ବିଶୋଧନ କରି, ଧାଡ଼ି ଧା଼ଡ଼ି କରି ମଞ୍ଜି ବୁଣିଲେ, ଭଲ ଚାରା ଉତ୍ପାଦନ ହୋଇଥାଏ ।
• ସର୍ବଦା ମାଟି ପରୀକ୍ଷା କରି, ପନିପରିବା ଚାଷରେ ଖତ ଓ ସାର ପ୍ରୟୋଗ କରନ୍ତୁ । ମାଟି ପରୀକ୍ଷାର ସୁବିଧା ନଥିଲେ, ପନିପରିବା ଫସଲ ଅନୁସାରେ ଅନୁମୋଦି ହାରରେ ଖତସାର ବ୍ୟବହାର କରନ୍ତୁ ।
• ସାଧାରଣତଃ ପନିପରିବା ଚାଷରେ ଅଳ୍ପ ପରିମାଣରେ, ମାତ୍ର ଅଧିକ ଥର ଜଳସେଚନ ଦ୍ୱାରା ଅଧିକ ଅମଳ ମିଳିଥାଏ ।
• ସମୟ ଅନୁସାରେ ପନିପରିବା ଫସଲରେ ରୋଗପୋକ ଦେଖାଦେଲେ ସଙ୍ଗେ ସଙ୍ଗେ ଦମନ ପାଇଁ ବ୍ୟବସ୍ଥା କରନ୍ତୁ ।
• ପ୍ରାୟ ସମସ୍ତ ପ୍ରକାର ପନିପରିବା ଚାଷରେ ଅଣୁସାର ଓ ହରମୋନର ଆବଶ୍ୟକତା ଥାଏ । ତେଣୁ ସବୁବେଳେ ଫସପଲ ଏହା ପ୍ରୟୋଗ କଲେ ଅଧିକ ଅମଳ ମିଳିଥାଏ ।
• ପନିପରିବା କିସମ ଅନୁସାରେ ଠିକ୍ ସମୟରେ ଅମଳ କରନ୍ତୁ ।
• ପନିପରିବା ଫସଲ ବିକ୍ରି କରିବା ପାଇଁ ସ୍ୱତନ୍ତ୍ର ବ୍ୟବସ୍ଥା କରିବା ଆବଶ୍ୟକ ।

ପନିପରିବା ଚାଷରୁ ଅଧିକ ଲାଭ କେମିତି ପାଇବେ ?

• ପନିପରିବାଚାଷରୁ ଅଧିକ ଲାଭ ପାଇବାକୁ ହେଲେ ବୈଜ୍ଞାନିକ ପ୍ରଣାଳୀରେ ଚାଷ କରିବା ଉଚିତ୍ ।
• ଭଲ ବିହନ ଆବଶ୍ୟକ ।
• ଆବଶ୍ୟକ ପରିମାଣରେ ଖତସାର ପ୍ରୟୋଗ ।
• ଠିକ୍  ସମୟରେ ରୋଗ ପୋକ ଓ ପ୍ରତିରୋଧ ବ୍ୟବସ୍ଥା କରିବାକୁ ପଡ଼ିବ ।
• ବଜାର ଚାହିଦା ଅନୁସାରେ ଚାଷ କରିବାକୁ ପଡ଼ିବି ।
• ଅଦିନିଆଁ ପରିବା ଚାଷ ବା ସଅଳ ଚାଷ କଲେ ସାଧାରଣତଃ ଅଧିକ ଲାଭ ହୋଇଥାଏ ଯେମିତି ବର୍ଷାଦିନେ କୋବି, ମୂଳା ଆଦି ପରିବାର ଚାହିଦା ଅଧିକ ଥାଏ ।
• ଉଚ୍ଚମୂଲ୍ୟଯୁକ୍ତ ପନିପରିବା ଯଥା ଗାଜର, କ୍ୟାପସିକମ୍ ଆଦି ଚାଷ କଲେ ଅଧିକ ଲାଭ ହୋଇଥାଏ ।
• ଆଜିକାଲି କେବଳ ପନିପରିବା ମଞ୍ଜି ଉତ୍ପାଦନ କରି ଅନେକ ଚାଷୀ ବେଶ ଲାଭବାନ ହୋଇ ପାରୁଛନ୍ତି ।
• ଅନେକ ସମୟରେ ଦୁଇ ତିନୋଟି ପନିପରିବା ମଧ୍ୟ ଏକ ସମୟରେ ଏକା ଜମିରେ ଚାଷ କରାଯାଇ ପାରିବ ।
• ପନିପରିବା ଚାଷ କରିବାକୁ ହେଲେ ଜମିର ଉର୍ବରତା ରକ୍ଷା କରବା ପାଇଁ ସବୁପ୍ରକାରର ଉଦ୍ୟମ ହେବା ଉଚିତ୍ ।
• ଏବଂ ଶେଷରେ ପନିପରିବାକୁ ଉଚିତ ଦରରେ ବିକ୍ରି କରିପାରିଲେ ଅଧିକ ଲାଭ ହୋଇପାରିବ ।

ଏକ ଉଦାହରଣ

ଜଣେ ଚାଷୀ ମଝାଳିଆ ବା ଢିପ ଜମିରୁ ଏକ ଏକର ଜମି ନିମନ୍ତେ ବର୍ଷସାରା ଜଳସେଚନ କରି ପନିପରିବା ଚାଷ କରିପାରିବ । ତେବେ ସେ ବର୍ଷକ ମଧ୍ୟରେ ଲକ୍ଷାଧିକ ଟଙ୍କା ରୋଜଗାର କରିପାରିବ ।

1. ମନେକରନ୍ତୁ ବର୍ଷାଦିନେ ଅଧ ଏକର ଜମିରେ ସଙ୍କର ଜାତୀୟ ବାଇଗଣ ଓ ଅଧ ଏକର ଜମିରେ ଭେଣ୍ଡି ଚାଷ କଲେ ତହିଁରୁ 80,000 ଟଙ୍କା ମିଳି ପାରିବ ।
2. ସେହିପରି ଶୀତଦିନେ ଅଧ ଏକର ଜମିରେ କୋବି ଓ ଅଧ ଏକର ଜମିରେ ବିଲାତି ବାଇଗଣ ଚାଷରୁ ଅନ୍ତତଃ 80,000 ରୁ 1,00,000 ଟଙ୍କା ରୋଜଗାର କରି ପାରିବ ।
3. ଖରାଦିନେ ଅଧ ଏକର ଜମିରେ ବରଗୁଡ଼ି ଓ ଅଧ ଏକର ଜମିରେ ବୋଇତି କଖାରୁ, ଜହ୍ନି, କାକୁଡ଼ି ଇତ୍ୟାଦି କଲେ ପ୍ରାୟ 80,000 ଟଙ୍କା ପାଇପାରିବ ।

ଏହି ତିନୋଟିଯାକ ଋତୁରେ ଚାଷ ଖର୍ଚ୍ଚ ଯାଇ ଅନ୍ତତଃ ପକ୍ଷେ 1,00,000 ଟଙ୍କା ଲାଭ ଉଠାଇ ପାରିବ । ସହର ନିକଟବର୍ତ୍ତୀ ଅଞ୍ଚଳ ହୋଇଥିଲେ ପନିପରିବା ବିକ୍ରି ନିମନ୍ତେ ସହଜ ହୋଇଥାଏ ।

ସାର ସମନ୍ଧରେ ସମ୍ୟକ୍ ଧାରଣା

• ଏହା ବ୍ୟତୀତ ବଜାରରେ ଅନ୍ୟାନ୍ୟ ସାର ମିଳୁଛି । ଜମିରେ ସାର ପକାଇବା ପୂର୍ବରୁ ଖାଦ୍ୟସାରକୁ ହିସାବ କରି ନିଅନ୍ତୁ ।
• ଏକ କିଲୋଗ୍ରାମ ଯବକ୍ଷାରଜାନ ଆବଶ୍ୟକ ଥିଲେ 2.200 କିଲୋଗ୍ରାମ ୟୁରିଆ କିମ୍ବା 4 କିଲୋଗ୍ରାମ କାଲସିୟମ୍ ଆମୋନିୟମ ନାଇଟ୍ରେଟ୍ କିମ୍ବା 5 କିଲୋଗ୍ରାମ ଆମୋନିୟମ୍ ସଲଫେଟ୍ ପ୍ରୟୋଗ କରନ୍ତୁ ।
• ସେହିପରି ଏକ କିଲୋଗ୍ରାମ ଫସଫରସ୍ ପାଇଁ 6.250 କିଲୋଗ୍ରାମ ସିଙ୍ଗଲ ସୁପର ଫସଫେଟ୍ ବ୍ୟବହାର କରନ୍ତୁ ।
• ଏକ କିଲାଗ୍ରାମ ପଟାସ୍ ପାଇଁ 1.600 କିଲୋଗ୍ରାମ ମ୍ୟୁରେଟ୍ ଅଫ୍ ପଟାସ ବ୍ୟବହାର କରନ୍ତୁ ।
• ସାରର ଆବଶ୍ୟକତାକୁ ଚାହିଁ ଯୌଗିକ ସାର ପରିମାଣ ହିସାବ କରନ୍ତୁ ।

ବିବରଣୀ- ଦୂରଶିକ୍ଷା କାର୍ଯ୍ୟକ୍ରମ, ସଂପ୍ରସାରଣ ଶିକ୍ଷା ନିର୍ଦ୍ଦେଶାଳୟ, ଓୟୁଏଟି, ଭୁବନେଶ୍ୱର